Төлеби ауданында табиғат аясындағы демалысты ұнататындар үшін жаңа туристік бағыттар көбейіп келеді. Соңғы жылдары өңірде экотуризммен қатар агротуризм мен балық шаруашылығына негізделген демалыс орындары да қарқынды дамып, келушілерге ерекше қызмет түрлерін ұсынып отыр. Осындай жобалардың бірі – Көксәйек ауылдық округіндегі «Сақ» демалыс аймағы.
Жалпы аумағы 3 гектарды құрайтын демалыс орны табиғат аясында тынығып, балық аулауды ұнататын туристер үшін қолайлы жағдай жасаған. Бүгінде мұнда балық шаруашылығы, қоғамдық тамақтану қызметі және ұлттық нақыштағы сақ моншасы жұмыс істейді. Кәсіпорын төрт адамды тұрақты жұмыспен қамтып отыр.
Демалыс аймағындағы үш жасанды көлде карп пен форель балықтары өсіріледі. Келушілер балық аулау процесіне өздері қатысып, жаңа ауланған балықтан дайындалған тағамдардың дәмін тата алады. Мұндай қызмет түрі балаларымен демалатын отбасылардың да, табиғат аясында тыныштық іздейтін саяхатшылардың да қызығушылығын арттыруда.
Кешеннің тағы бір ерекшелігі – ежелгі дәстүр негізінде жасалған сақ моншасы. Табиғаттың тыныштығы мен ұлттық нақыштағы демалыс үйлесім тапқан бұл орын келушілерге ерекше әсер сыйлайды.
Мұндай жобалар ауыл туризмін дамытуға тың серпін беріп қана қоймай, өңірдің кәсіпкерлік әлеуетін арттыруға да ықпал етуде. Балық шаруашылығы бүгінде тек азық-түлік өндіретін сала ғана емес, экологиялық және танымдық туризмді дамытудың тиімді бағытына айналып келеді. Сондықтан «Сақ» демалыс аймағы Төлеби ауданының туристік нысандары қатарын толықтырып, табиғатпен етене тынығуды қалайтын қонақтар үшін тартымды орындардың біріне айналып отыр.
