Ішкі туризмді дамыту бағытында елімізде соңғы жылдары жүйелі жұмыстар жүргізіліп келеді. Бұл ретте табиғаты көркем, туристік әлеуеті жоғары Түркістан облысының алар орны ерекше. Киелі орындарымен қатар өңірде экотуризм де қарқынды дамып келеді. Осы бағыттағы жетекші аймақтардың бірі – Алатаудың баурайында орналасқан Төлеби ауданы.
Ауданның ең көрікті туристік бағыттарының бірі – "Сайрамсу шатқалы". «Сайрам-Өгем» мемлекеттік ұлттық табиғи паркінің аумағында орналасқан бұл шатқал табиғаттың қайталанбас сұлулығымен ғана емес, биологиялық алуандығымен де ерекшеленеді. Мұнда Қызыл кітапқа енген өсімдіктер мен жануарлардың ондаған түрі мекендейді. Паркте құстардың 300-ге жуық, сүтқоректілердің 60-тан астам түрі кездеседі. Олардың қатарында қар барысы, Тянь-Шань қоңыр аюы, тау ешкісі, сібір елігі, қабан және өте сирек кездесетін Мензбир суыры бар. Ал өсімдіктер дүниесінде Грейг қызғалдағы, Кавказ таудағаны, Зеравшан аршасы, ақ қайың, шырғанақ, итмұрын, бүлдірген секілді сирек өсімдіктер өседі.
Саяхатшылар үшін шатқалда барлық қажетті жағдай қарастырылған. Қонақүйлер, киіз үйлер, монша, демалыс алаңдары жұмыс істейді. Келушілер табиғи тау қымызынан дәм татып, тау гүлдерінен жиналған табиғи балдың ерекше дәмін сезіне алады.
Сайрамсу шатқалының басты көрікті орны – мұздық суынан пайда болған "Сайрамсу көлі". Теңіз деңгейінен 2500 метр биіктікте орналасқан көлдің ерекшелігі – суының табиғи түрде екі түрлі реңкке бөлінуі. Бір бөлігі ақшыл көк, екінші бөлігі көгілдір түспен көмкерілгендей әсер қалдырады. Жергілікті халық бұл ерекшелікті ғашықтар туралы көне аңызбен байланыстырады. Аңыз бойынша, бір-біріне қосыла алмаған екі жастың мәңгілік махаббаты көлдің қос түсті суында сақталып қалған. Содан бері көлдің қос реңкі ешқашан араласпайды деген сенім бар.
Көлге апарар бағыттың ұзындығы шамамен 14 шақырымды құрайды. Бағыт «Алтекс» туристік кешенінен басталып, Сайрамсу өзенінің көркем шатқалы, арша мен қайың ормандары, гүл көмкерген альпі шалғындары арқылы өтеді. Табиғат аясындағы бұл жаяу саяхат бірнеше сағатқа созылғанымен, жол бойындағы көріністер әрбір қадамыңызды ұмытылмас әсерге бөлейді.
Сайрамсу көліне келушілер саны табиғатты қорғау мақсатында реттеледі. Туристік маусымда көлге аптасына бірнеше топтың ғана баруына рұқсат етіледі. Ал көктемде құстар мен жануарлардың көбею кезеңінде келушілер саны арнайы шектеледі. Бұл табиғи экожүйені сақтауға бағытталған маңызды шаралардың бірі.
Табиғаттың тылсым сұлулығы, саф ауа, мұздық көлдер мен бай биоалуантүрлілік Сайрамсу шатқалын Төлеби ауданындағы ең тартымды экотуризм бағыттарының біріне айналдырып отыр. Сондықтан бұл мекен жыл сайын табиғат аясында тынығып, тау әлемінің ғажайып көріністерін тамашалауды қалайтын саяхатшылардың сүйікті бағытына айналып келеді.
