Ғалымжан Елшібайдың «AMANAT» партиясынан сайланған Түркістан облыстық мәслихатының депутаты ретінде халық алдындағы кезекті есептік кездесуі - Төле би ауданы Көксәйек ауылында орналасқан №3 арнаулы әлеуметтік қызметтер көрсету орталығында жалғасты. Есептік кездесуге Төле би аудандық жұмыспен қамту және әлеуметтік бағдарламалар бөлімінің басшысы Рабиға Бейсебаева да қатысты. Мүмкіншілігі шектеулі жандарға тұрмыстық, медициналық, психологиялық, еңбек және мәдени бағыттағы қызметтерді көрсетіп келе жатқан бұл орталықтың атқарып отырған еңбегі орасан. Сонау 1989 жылы салынған бұл мекемеде 18 жастан асқан психоневрологиялық аурулары бар І-ІІ топтағы мүгедектігі бар адамдарға әлеуметтік қызметтер ұсынылады.
Көп жылдан бері қаржы бөлінбей тозығы жеткен екі корпустан тұратын ғимаратқа күрделі жөндеу жұмыстарын жүргізу қажеттілігі біраз жылдан бері жыр болып жүрген еді. Осы өзекті мәселені Ғалымжан Елшібай "Amanat" партиясынан сайланған облыстық мәслихат депутаты ретінде алқалы жиында бірнеше дүркін дабыл қақты. Депутат былтыр осы мақсатта бюджеттен 600 млн теңгенің бөлінуіне қол жеткізді.
Күрделі жөндеуден өткен мекемеге қарасаңыз көзің тоятындай жайнап тұр. Депутат нысанның жұмысымен танысып, аралағанда қатардағы арнаулы әлеуметтік қызметтер көрсету орталығынан гөрі сән-салтанаты келіскен шипажайға көбірек ұқсатты. Мұнда мүмкіндігі шектеулі жандардың дұрыс ем-дом алуына барлық жағдай жасалғанын ризашылықпен атап өткім келеді. Монша мен душ кабинкалары істеп тұр. Әлеуметтік қызмет алушыларға арнап жаңадан массаж кабинеті, тіпті шаштараз ашылыпты. Мекеме жұмысының осылайша дұрыс жолға қойылуындағы іскер де білікті басшы Шәрбат Оразалықызының еңбегі зор.
Бүгінгі таңда Түркістан облысында мүгедектігі бар адамдардың жалпы саны 102 мың болса, оның ішінде 15 мыңнан астамы – балалар екен. Сайлаушылардың кең қолдауына ие болған «AMANAT» партиясы да, әлеуметтік әділдік орнатуды қызметінің мәні етіп белгілеп, ерекше күтімді қажет ететін азаматтар мен мүмкіндігі шектеулі жандардың қажетті көмек көлемімен қамтылуын, оларға қолайлы орта түзілуін, оңалту шараларына қатысу мүмкіндіктерінің кеңейтілуін Сайлауалды бағдарламасының өзегі етіп белгілеген. «AMANAT» партиясы жанындағы Отбасы және әлеуметтік қолдау жөніндегі Кеңестің төрағасы, «Кедергісіз келешек» партиялық жобасының Түркістан облысындағы амбассадоры ретінде осы міндеттердің орындалуына мән беріп, мүмкіндігінше атсалысып келемін. Мүгедектігі бар азаматтар өздерін қоғамның толыққанды мүшелері екенін сезініп, мемлекеттік маңызы бар істерге белсенді түрде араласуының маңызы зор. Ерекше қажеттіліктері бар азаматтарды әлеуметтік қорғау және олардың қоғам өміріне белсенді араласуына жағдай жасау - мемлекетіміздің әлеуметтік саясатының басым бағыттарының бірі.
Мекеменің ұжымымен болған кездесу барысында Ғалымжан Елшібай «АМАNАТ» партиясының сайлауалды бағдарламасы аясындағы «Жол картасының» іске асырылу барысы, облыстық мәслихаттың араласуымен шешімін тауып жатқан мәселелер туралы баяндады. Сонымен қатар, ол партияның жаңа бастамаларының ерекшеліктерімен таныстырып өтті. Солардың ішінде Мемлекет басшысы Қ.Тоқаевтың тұрғын үй қоры басқару жүйесін жаппай реформалау бойынша тапсырмасына сәйкес қолға алынған «TURǴYNDAR AMANATY» пилоттық жобасының маңыздылығына тоқталды. «Ауыл аманаты» жобасының жетістіктерін де тілге тиек еттім. Бұл жобаның әр аймақтағы, оның ішінде Төле би ауданындағы қарапайым тұрғындардың өмірін жақсартуға қосқан үлесі зор екені белгілі.
Есеп беру жиынына қатысушылар тарапынан бірқатар сұрақтар қойылып, өтініштер де айтылды. Мәселен, орталықтың қызметкерлері Көксәйек ауылындағы сапасыз ауыз су мәселесін қозғады. Айта кеткен жөн, осы төңіректегі бірқатар елді мекендер көп жылдан бері ауыз судың азабын тартып келе жатыр. Тек Көксәйек емес, бұған қоса Қаратөбе мен Тасарық ауылдық округіндегі 12 елді мекеннің тұрғындары да жаңбыр жауса лай аралас суды ішуге мәжбүр. Мәселені бірден шешіп тастауға қолбайлау болған жайт – су қоры ретінде таңдалған «Бақырауық» бұлағынан құбыр тартуға салалық министрліктің рұқсаты қажет болды. Өйткені бұлақ ерекше қорғалатын аймақ - Ақсу-Жабағылы қорығына кіреді. Дегенмен, тиісті рұқсат алынып, алдағы уақытта ауыз су мәселесі толық шешімін табатын болады. Ол үшін бюджеттен қомақты қаржы қаралды. Енді қаржының дұрыс игерілуін бақыласақ бір емес 12 елді мекеннің тұрғындары сапалы ауыз су ішетін күн алыс емес.
