Түркістан облысы бойынша Ішкі мемлекеттік аудит департаменті 2026 жылдың І тоқсанында жүргізілген аудиторлық іс-шаралардың қорытындысына сәйкес, аудит объектілеріне барып сауалнама және түсіндірме жұмыстарын ұйымдастыру жоспарын әзірледі. Аталған шаралардың негізгі мақсаты – жүргізілген аудит нәтижелерінің ашықтығын қамтамасыз ету, аудит объектілерімен өзара сенімді нығайту, сондай-ақ тексеру барысында анықталған кемшіліктердің заңсыздыққа ұласпауын қадағалау болып табылады. Сонымен қатар, бұл іс-шаралар мемлекеттік аудиттің тиімділігін арттыруға, тексеру процесіне деген сенімді қалыптастыруға және мекемелердегі ішкі бақылау жүйесін күшейтуге бағытталған.
Өз кезегінде, ішкі мемлекеттік аудит жүйесі бюджет қаражатының заңды, тиімді және мақсатты пайдаланылуын қамтамасыз етуге арналған. Осыған байланысты, жүргізілген аудиттік іс-шаралардың нәтижелері бойынша аудит объектілеріне бару барысында департаменттің жауапты аудиторлары тарапынан қандай да бір кемшілік немесе заң бұзушылық орын алған-болмағандығы тексеріліп, алдын алу шаралары қабылданады.
2026 жылдың наурыз айында Түркістан қаласы мен Сауран ауданы аумағында бірқатар білім беру ұйымдары, медициналық мекемелер және облыстық деңгейдегі мемлекеттік мекемелерде түсіндірме және сауалнама жұмыстары жүргізілді. Аталмыш мекемелерде аудиторлық іс-шаралар 2025 жылдың желтоқсан айынан бастап 2026 жылдың ақпан айына дейін жүзеге асырылып, тиісті қорытындылар жасалды.
Аталған іс-шаралардың маңызды бағыттарының бірі – мемлекеттік қызметшілердің қызметтік әдеп нормаларын сақтау мәселесі. Мемлекеттік қызметшілер өз қызметін заңдылық, адалдық, әділдік және ашықтық қағидаттарына сәйкес жүзеге асыруы тиіс. Сауалнама және түсіндірме жұмыстары барысында қызметшілердің Әдеп кодексін сақтау, қызметтік әдеп мәдениетін қалыптастыру және қоғам тарапынан мемлекеттік органдарға деген сенімді арттыру мәселелеріне ерекше назар аударылды.
Сауалнама жүргізудің негізгі мақсаты – аудит барысында департамент қызметкерлері тарапынан қызметтік әдеп нормаларының сақталуын, заң талаптарының орындалуын, сондай-ақ аудит жүргізу кезінде қандай да бір заңсыз талаптар немесе сыбайлас жемқорлық сипатындағы әрекеттердің болмағанын анықтау болып табылады. Аудит объектілерінің өкілдерінен аудит қызметкерлері тарапынан материалдық сыйақы талап ету, қысым көрсету немесе қызметтік әдепке қайшы әрекеттердің болған-болмағаны туралы пікірлер алынды.
Сонымен қатар, түсіндірме жұмыстары барысында Қазақстан Республикасының «Сыбайлас жемқорлыққа қарсы іс-қимыл туралы» Заңы талаптары еске салынды. Заңға сәйкес, сыбайлас жемқорлық құқық бұзушылықтары үшін тек пара алған тұлға ғана емес, пара берген тұлға да жауапты болып табылады.
2026 жылдың 30-31 наурыз аралығында Түркістан қаласында орналасқан жеке меншік білім беру ұйымдары – Qarashyq-М, Иқан мектеп-гимназиясы, Miras-M school, Zerek intellectual school және Abay school lyceum – аудит объектілері ретінде сауалнама жүргізуге қатысты.
Жалпы алғанда, жүргізілген сауалнама және түсіндірме жұмыстары мемлекеттік аудит жүйесінің ашықтығын қамтамасыз етуге, аудит қызметкерлерінің қызметтік әдеп нормаларын сақтауын бақылауға, сыбайлас жемқорлыққа қарсы мәдениетті қалыптастыруға және ұйымдардағы ішкі бақылау жүйесін күшейтуге бағытталған.
