Төлеби ауданындағы туристер мен зияратшылар көп баратын қасиетті орындардың бірі – "Жылақ ата" мекені. Тарих пен аңызға тұнған бұл орын ең алдымен жартастан тамшылап ағатын шипалы суымен ерекшеленеді. Жергілікті жұрттың айтуынша, әр бұлақтың суы өзіне тән дәмге ие әрі көз, жүрек, асқазан, бауыр, бүйрек секілді түрлі сырқаттарға шипалы саналады.
Жартас етегіндегі үңгір мен одан тамшылап ағатын бұлақ суына қатысты халық арасында бірнеше аңыз сақталған. Соның бірінде бағзы заманда Арабиядан ислам дінін насихаттау үшін Сайдсахи Жамал есімді діндар осы өңірге келгені айтылады. Ол үңгірді паналап, ел арасында емшілікпен айналысып, көпшілікке шарапатын тигізген. Кейінгі жаугершілік заманда екі ұлынан айырылып, өмірінің соңына дейін осы жерде ғұмыр кешкен екен. Ел аузындағы әңгімелерде бүгінге дейін жартастан тамшылап тұрған бұлақ суы әкенің төгілген көз жасы деп айтылады.
Тағы бір аңызда жаугершілік кезінде осы маңда қаза тапқан балалардың қасіретімен байланысты оқиға баяндалады. Содан бері халық бұл жерді "Жылақ ата" деп атап кеткен. Киелі орынға келушілердің айтуынша, жартастан тамшылаған су күндіз де, түнде де кемпірқосақтың түсіндей құбылып көрінеді. Бұл құбылыс Жылақ атаның өзгеше тылсым сипатын айқындай түседі.
Қасиетті орын қалың тоғайдың ішінде орналасқандықтан, оған жету оңай емес. Соған қарамастан Алладан шипа тілеп, рухани медет іздеген адамдардың қарасы азаймайды. Келушілер бұлақ суынан дәм татып қана қоймай, әр бұлақтың суын жеке-жеке ыдыстарына құйып алып кетеді.
Соңғы жылдары киелі орынға апаратын жолды жақсарту бағытында бірқатар жұмыстар атқарылып, келушілерге қолайлы жағдай жасауға көңіл бөлінуде. Ал алдағы уақытта "Жылақ атаға" түсіп-шығуды жеңілдететін баспалдақтар мен қосымша инфрақұрылым нысандарын салу жоспарланып отыр.
Тылсым табиғаты мен ғасырлардан жеткен аңыздары тоғысқан "Жылақ ата" бүгінде Төлеби ауданындағы рухани туризмнің маңызды нысандарының біріне айналып, тарих пен табиғатқа қызығатын саяхатшыларды өзіне тартып келеді.
