Төлеби ауданында жыл соңына дейін туризм әлеуетін арттыру мақсатында 12 туристік нысан іске қосылмақ. Жобаның жалпы құны - 4,2 миллиард теңгені құрайды. Егер мақсат жүзеге асса, 151 адам жұмыспен қамтылатын болады. Жалпы ауданда туристерге сапалы қызмет көрсетіп отырған белсенді, заманауи демалыс кешендері көп. Солардың бірі - "TauPark Қасқасу" демалыс аймағы саяхатшылардың сүйікті орнына айналған мекен. Таудың таза ауасынан бөлек демалыс орнын өзгелерден ерекшелеп тұрған дүние — алма бақтың болуы. Мұнда велосипед тебу, теннис, воллейбол, бадминтон ойындары сынды белсенді демалыс түрлеріне басымдық берген.
Сондай-ақ мұнда рафтингпен айналысып, балық аулап, жаяу немесе атпен тау бөкетерін аралауға жағдай жасалған Жылқылардың барлығы қолға үйретілген. Ал қыс мезгілінде демалуышлар шаңғы тебе алады. Салауатты өмір салтын басты назарға алған демалыс аймағында коттедждер мен киіз үйлер орналасқан.
Жан-жағын тау шатқалдары мен жасылжелек қоршаған демалыс орны Шымкент қаласынан 65 шақырым қашықтықтағы Жоғарғы Қасқасу ауылы маңындағы арқырап ағып жатқан Қасқасу өзені бойында таза экологиялық аймақта орналасқан. Аумағы 3 гектар.
